“50+闲话”专栏，正式开启！聚焦老友们的所见所闻所思所感，呈现50+生活状态！邀您以文会友，闲话人生！
一日三餐，
总是蔬肉鱼虾。
人生在世，
无非酸甜苦辣。
△画作者丨沈一珠
按老底子的讲法，青皮绿玉蚕豆的上市日脚勒春天里的三四月份辰光。当季的时鲜，常常是一刹忽的。也有过迭个印象，就是明明前两天还看见铺天盖地的蚕豆，四月一过，一记头侪没了。只不过，现在一年四季，天气乱得来，侬倒是讲讲看，又有几个人搞得清爽，春天到底是从啥辰光开始的呢？
某一日早上，雨过，天还阴恻恻，出门散步，经过小菜店辰光，看见店老板以及小工一道忙忙碌碌，立停一歇，想想今朝要喫点啥，就听到有人勒问：哎，蚕豆几钿一斤？哦哟，蚕豆已经来了，搿末，春天应该是来仔一歇了。
一年四季，一日三餐的，交关人肯定侪一样，跟小菜店老板老熟；有辰光，拎一袋炒米花排勒后头——辣末生头，就特别想坐好仔，一粒一粒慢慢交喫炒米花——店老板会跟拎一大堆菜等仔结账的爷叔讲一声，让伊先结账好伐？迭种人与人之间的善意，会让人想起小辰光小区里来了爆炒米花的爷叔，邻邻居居侪拎仔米、晒干的切片年糕，闹闹猛猛勒爆米花炉子前排队，常常有外婆阿姨摆只篮头又回去烧小菜了，快挨着了，会有人喊一声：外婆，快来，排着侬了。
一晃几十年，有种东西会变，有种东西勿会变。
蚕豆好喫。顶老早上海人侪只喫本地豆，壳软绵绵的，一节含两粒豆，剥出来，青皮绿玉，老好看还好喫。常常是清炒的，新鲜辰光，连头带尾巴，五分钟左右就好，水嫩嫩鲜洁洁，可以连皮带肉一道喫下去。
后来，也喫一种客豆，区别于勿是上海本地产的蚕豆，上市辰光也要比本地豆早一个月左右。客豆长得长一码大一码，一节里常常有三四粒，剥出来的豆从里到外侪是灰白的，葱油炒炒也可以，就是皮老，要吐皮喫。再后来，又出来一种日本豆，横阔竖大，有人特别欢喜伊粉粉糯糯的口感，所以，剥脱皮，加咸菜一道油里炒好，再加水，慢慢煨成咸菜豆板酥顶好了。
搿日买的蚕豆，外表看上去已经有点灰蒙蒙了，不过，摸上去软绵绵，剥出来的豆，大大小小，还算嫩。新上市的豆，当然是清炒，喫的是春天里的嫩头。要保持伊的鲜嫩，一定要炒前头再剥，上海人也叫捏蚕豆，一节豆当中拗开，手勒壳外头轻轻捏一捏，豆就滑落到碗里了。剥好仔，开油镬之前先盖一盖，露勒空气里辰光长了，豆也要老脱。
热锅冷油，葱段、豆一道摆下去，火勿要太大，用镬铲轻轻交拨一拨，让每粒豆侪拨油包牢，然后加一小碗水，拿豆浸没，加少许盐，习惯上海菜的，也可以加一点点糖提鲜，盖镬盖，大火烧开，稍许滚两滚，就好了。
看见蚕豆，想起一桩往事，侪勒心急慌忙抢菜。齐巧蚕豆上市，小菜店老板讲，蚕豆勿分拆整包卖，一包10斤。看见有小小巧巧阿姨拖一整包蚕豆勒小区里走。
蚕豆喫勿光，摆两三天是可以的，辰光再长，顶好是剥出来摆冷冻室，到喫的辰光，连保鲜袋一道摆水里解冻就好。冻过的蚕豆除脱烧豆瓣酥，做成蚕豆浓汤也另有一功。蚕豆开水焯熟，剥皮，然后可以跟焯熟的洋葱、胡萝卜或者自家欢喜的蔬菜一道摆到粉碎机里打碎，用盐、胡椒粉合好味道，再用高汤调到自家欢喜的厚薄就可以了。
来源：海上一珠 作者：沈一珠
